Նորություններ

Վարչապետի գավաթը կխաղարկվի երկրորդ անգամ

Անցյալ տարի առաջին անգամ Երևանում անցկացվեց հանդբսլի Հայաստանի վարչապետի գավաթի խաղարկությունը: Այն մեծ հետաքրքրություն էր առաջացրել: Եվ փակման արարողության ժամանակ Հայաստանի հանդբոլի ֆեդերացիայի նախագահ Սարգիս Գրիգորյանը հայտարարել էր, որ ստուգատեսը կդառնա ավանդական: Եվ ահա, այն երկրորդ անգամ է կազմակերպվելու: Որոշվել է, որ այս տարի  մրցաշարն անցկացվելու է սեպտեմբերի 1-5-ին: Մեր երկրի հավաքականից բացի, մասնակցելու են Իրանի, Վրաստանի հանդբոլիստները: Հրավերներ են ուղարկվել նաև Ռուսաստանի, Բելգիայի, Չեխիայի ներկայացուցիչներին:

Խաղեր` Թբիլիսիում և Երևանում

Հայաստանի ներկայացուցիչները լրջորեն են նախապատրաստվում մայիսի 21-ին Սերբիայի մայրաքաղաք Բելգրադում մեկնարկելիք մինչև 18 տարեկան հանդբոլիստների Եվրոպայի առաջնության ընտրական մրցաշարին:Հայաստանի հանդբոլիստների հետ միասին միևնույն խմբում են ընդգրկված նաև Սերբիայի, Բուլղարիայի, Հունաստանի հավաքականները: Պայքարը շարունակելու իրավունք է ստանալու միայն մեկ հավաքական և, առաջին տեղի համար սուր մրցակցություն է սպասվում: Ընդ որում` բոլոր երկրներն էլ հանդբոլային են, և ուժեղ հավաքականներով են մրցավայր ներկայանալու:

 Հայաստանի հավաքականը, համալրված տասնվեց խաղացողներով, մարզիչներ Զեփյուռ Վանեսյանի և Արարատ Բարսեղյանի գլխավորությամբ ուղևորվեց Վրաստանի մայրաքաղաք Թբիլիսի և մայիսի 13-ին, 14-ին, 15-ին ընկերական հանդիպումներ կանցկացնի Վրաստանի իր հասակակիցների հետ: Մայիսի 16-ին, 17-ին, 18-ին արդեն  Հայաստանի պատանեկան հավաքականը Վրաստանի ընտրանիին կհյուրընկալի Երևանում: Կկազմակերպվեն նաև համատեղ ուսումնամարզական պարապմունքներ: Մայիսի  20-ին Հայաստանի ներկայացուցիչները կուղևորվեն  մրցավայր: Ի դեպ, Հայաստանի պատանեկան հավաքականին Բելգրադում միանալու են Ֆրանսիայում բնակվող և մրցելույթներ ունեցող մեր վեց հայրենակիցներ: Հայաստանի հավաքականը վերջնականորեն կձևավորվի միայն ստուգատեսի մեկնարկից առաջ: Այնպես որ, Հայաստանի հավաքականը մարտական կազմ կունենա: Թերևս, մեր միակ խնդիրն այն է, որ հնարավոր չի եղել համատեղ ուսումնամարզական հավաքներ անցկացնել: Ընդ որում, խնդիրը ֆինանսական չէ: Խանգարողն այն հանգամանքն է, որ մեր հայրենակիցները սովորում են ուսումնական տարբեր հաստատություններում և չեն կարողացել դասերը բաց թողնել: Խաղերը կայանալու են մայիսի 21-24-ին: Ի դեպ, եվրոպական 5 խմբերում վիճարկվում են երկուական ուղեգրեր, միայն երկու խմբում է, որ մեկական ուղեգիր է խաղարկվում: Եվ  մերոնք վիճակահանությամբ հայտնվել են հենց վերջիններից մեկում: Այնպես որ, մերոնց խնդիրն է լինելու արժանի դրսևորել իրենց:



 

Սեմինարը կվարի չեխ մանագետը

Մայիսի 14-16 Երևանում կանցկացվի հանդբոլի մարզիչների սեմինար, որը կվարի չեխ մասնագետ Մարտին Տուման: Ինչպես հայտնի է, Հայաստանում իրականացվում է հանդբոլի զարգացման «Սմարթ» ծրագիրը, և վեց մարզիչներ այդ մարզաձևի գաղտնիքներում հմտացնում են պատանիների և աղջիկների դպրոցական երկուական խմբերի:Ընդհանուր հաշվով պարապում է 12 խումբ: Եվ ահա, այդ ծրագրի շրջանակում Եվրոպայի հանդբոլի ֆեդերացիան Հայաստան է գործուղել  Տումային, ով տեսական և գործնական պարապմունքներ կանցկացնի հանդբոլի երիտասարդ մարզիչների հետ: Մայիսի 14-ին ժամը 11-ին մայրաքաղաքի Հյուսիսային համալսարանի դահլիճում կկազմակերպվի տեսական պարապմունք: Ապա մասնակիցները Երևանի Ջոն Կիրակոսյանի անվան դպրոցի մարզասրահում գործնական պարապմունքներ կանցկացնեն: Եվ այդպես կշարունակվի ևս երկու օր: Հրավիրվել են Հայաստանի բոլոր մարզերից: Նախատեսվում է, որ սեմինարին կմասնակցեն երեք տասնյակից ավելի մարզիչներ: Վերջում` նրանք  հավաստագրեր կստանան: Ի դեպ, մեր երկրի ազգային օլիմպիական կոմիտեն նախատեսում է հուլիսին Հայաստանում հանդբոլի մարզիչների համար կազմակերպել 10-օրյա սեմինար: Արդեն հայտնի է, որ դասընթացը վարելու համար մասնագետ է գալու Սիրիայից: Միջոցառմանը կայանալու է Վանաձորում: Սեմինարի ավարտից հետո Հայաստանի մասնագետները քննություն կհանձնեն և մարզչական կարգ կստանան:

Շենգավիթցիներն առաջ են անցնում

Վանաձորում ավարտվեց Հայաստանի հանդբոլի աղջիկների առաջնության առաջին շրջանի մրցաշարը: Վերջին հինգ հանդիպումներում հետևյալ արդյունքներն արձանագրվեցին.

Ընթերցել...

Մնացել է հինգ խաղ

Վանաձորում շարունակվում են Հայաստանի հանդբոլի աղջիկների առաջնության առաջին շրջանի խաղերը: Անսպասելի իրադարձություններ չարձանագրվեցին: Հանդիպումներն այսպիսի ելքեր ունեցան. Շենգավիթ-Վանաձոր` 28:10, Գեղարքունիք-Արցախ` 3:14, Երևանի հանդբոլի մասնագիտացված դպրոց-Ստեփանավան 19:5, Ստեփանավան-Գեղարքունիք`16:4, Շենգավիթ-Արցախ`20:4: Ապրիլի 28-ին կկայանա  հինգ հանդիպում, որով էլ կավարտվի առաջին շրջանը:

Այս անգամ` երեք բացակայող

Վանաձորում պայքարը սկսեցին Հայաստանի հանդբոլի  աղջիկների առաջնության առաջին շրջանի մասնակիցները: Ուժերն են չափում մինչև տասնվեց տարեկան խաղացողներով համալրված 6 թիմեր: Ցավալի է, բայց փաստ, որ ինչպես մի քանի օր առաջ կայացած պատանիների առաջնությունում, այս անգամ էլ թիմ  մրցավայր չեն գործուղել Գյումրիի ներկայացուցիչները:Պատվիրակներ չունեն նաև Խաղերի մանկապատանեկան օլիմպիական մարզադպրոցը և Նոր Նորք համայնքը: Մեկնարկային խաղերում գրանցվեցին այսպիսի արդյունքներ`Ստեփանավան-Արցախ`6:16, Երևանի հանդբոլի մասնագիտացված դպրոց-Վանաձոր`16:13, Շենգավիթ-Գեղարքունիք` 24:5, Վանաձոր-Ստեփանավան` 25:10, Արցախ-Երևանի հանդբոլի մասնագիտացված դպրոց`14:20: Մրցումները կավարտվեն ապրիլի 28-ին: Առաջնության երկրորդ շրջանը կկայանա հոկտեմբերին Երևանում: Նոյեմբերին էլ անցկացվելիք եզրափակիչ մրցաշարում կորոշվի չեմպիոնը:

Tuesday the 9th. Pointlink.net. z1news.am Copyright @ 2009-2011 AHF.All Rights Reserved.
Copyright 2012

©


Powered by z1news.am