Նորություններ

Կրկին Գյումրին բացառություն

Շաբաթ, 15 Մայիս 2010 00:22

Մայիսի 14-ին Երևանի Հյուսիսային համալսարանի նիստերի դահլիճում սկսվեց սեմինար, որին մասնակցում են Հայստանի հանդբոլի մարզիչները: Այն վարում է Մարտին Տուման:

 Նախքան միջոցառումը սկսելը ներկաներին ողջունեց Հայաստանի հանդբոլի ֆեդերացիայի փոխնախագահ Հարություն Մելքոնյանը:  Ներկայացնելով Տումային, նա նշեց, որ նա նախկինում բարձրակարգ խաղացող է եղել, աշխատել է մարզիչ, ճանաչված մասնագետ է Եվրոպայում: Ի դեպ, երկրորդ անգամ է չեխ մասնագետը պարապմունքներ անցկացնում մեր մարզիչների հետ:  Դասախոսությանը զուգահետ ցուցադրվեցին հանդբոլի երկու տեսաֆիլմեր: Դրանք նվիրված էին մինի հանդբոլին և մանկապատանեկան խմբերի հետ մարզումների կազմակերպմանը: Տեսական պարապմունքին հաջորդեց գործնականը: Օրվա երկրորդ կեսին սեմինարի շուրջ երեք տասնյակ մասնակիցները տեղափոխվեցին մայրաքաղաքի Ջոն Կիրակոսյանի անվան  դպրոցի մարզասրահ: Այստեղ ցուցադրական պարապմունք անցկացվեց մարզվողների խմբի հետ: Սեմինարը կշարունակվի մինչև մայիսի 16-ը: Միջոցառմանը մասնակցում են  Հայաստանի հանդբոլի բոլոր կենտրոնների ներկայացուցիչները: Բացառություն են կազմում միայն գյումրեցիները: Ի դեպ, Գյումրին պատվիրակներ չէր ուղարկել նաև օրերս Վանաձորում կազմակերպված Հայաստանի պատանիների և աղջիկների առաջնություններին: Այնպես որ, տխուր այս փաստը ևս չի կարելի պատահականությանը վերագրել:

Վարչապետի գավաթը կխաղարկվի երկրորդ անգամ

Հինգշաբթի, 13 Մայիս 2010 11:09

Անցյալ տարի առաջին անգամ Երևանում անցկացվեց հանդբսլի Հայաստանի վարչապետի գավաթի խաղարկությունը: Այն մեծ հետաքրքրություն էր առաջացրել: Եվ փակման արարողության ժամանակ Հայաստանի հանդբոլի ֆեդերացիայի նախագահ Սարգիս Գրիգորյանը հայտարարել էր, որ ստուգատեսը կդառնա ավանդական: Եվ ահա, այն երկրորդ անգամ է կազմակերպվելու: Որոշվել է, որ այս տարի  մրցաշարն անցկացվելու է սեպտեմբերի 1-5-ին: Մեր երկրի հավաքականից բացի, մասնակցելու են Իրանի, Վրաստանի հանդբոլիստները: Հրավերներ են ուղարկվել նաև Ռուսաստանի, Բելգիայի, Չեխիայի ներկայացուցիչներին:

Խաղեր` Թբիլիսիում և Երևանում

Հինգշաբթի, 13 Մայիս 2010 11:07

Հայաստանի ներկայացուցիչները լրջորեն են նախապատրաստվում մայիսի 21-ին Սերբիայի մայրաքաղաք Բելգրադում մեկնարկելիք մինչև 18 տարեկան հանդբոլիստների Եվրոպայի առաջնության ընտրական մրցաշարին:Հայաստանի հանդբոլիստների հետ միասին միևնույն խմբում են ընդգրկված նաև Սերբիայի, Բուլղարիայի, Հունաստանի հավաքականները: Պայքարը շարունակելու իրավունք է ստանալու միայն մեկ հավաքական և, առաջին տեղի համար սուր մրցակցություն է սպասվում: Ընդ որում` բոլոր երկրներն էլ հանդբոլային են, և ուժեղ հավաքականներով են մրցավայր ներկայանալու:

 Հայաստանի հավաքականը, համալրված տասնվեց խաղացողներով, մարզիչներ Զեփյուռ Վանեսյանի և Արարատ Բարսեղյանի գլխավորությամբ ուղևորվեց Վրաստանի մայրաքաղաք Թբիլիսի և մայիսի 13-ին, 14-ին, 15-ին ընկերական հանդիպումներ կանցկացնի Վրաստանի իր հասակակիցների հետ: Մայիսի 16-ին, 17-ին, 18-ին արդեն  Հայաստանի պատանեկան հավաքականը Վրաստանի ընտրանիին կհյուրընկալի Երևանում: Կկազմակերպվեն նաև համատեղ ուսումնամարզական պարապմունքներ: Մայիսի  20-ին Հայաստանի ներկայացուցիչները կուղևորվեն  մրցավայր: Ի դեպ, Հայաստանի պատանեկան հավաքականին Բելգրադում միանալու են Ֆրանսիայում բնակվող և մրցելույթներ ունեցող մեր վեց հայրենակիցներ: Հայաստանի հավաքականը վերջնականորեն կձևավորվի միայն ստուգատեսի մեկնարկից առաջ: Այնպես որ, Հայաստանի հավաքականը մարտական կազմ կունենա: Թերևս, մեր միակ խնդիրն այն է, որ հնարավոր չի եղել համատեղ ուսումնամարզական հավաքներ անցկացնել: Ընդ որում, խնդիրը ֆինանսական չէ: Խանգարողն այն հանգամանքն է, որ մեր հայրենակիցները սովորում են ուսումնական տարբեր հաստատություններում և չեն կարողացել դասերը բաց թողնել: Խաղերը կայանալու են մայիսի 21-24-ին: Ի դեպ, եվրոպական 5 խմբերում վիճարկվում են երկուական ուղեգրեր, միայն երկու խմբում է, որ մեկական ուղեգիր է խաղարկվում: Եվ  մերոնք վիճակահանությամբ հայտնվել են հենց վերջիններից մեկում: Այնպես որ, մերոնց խնդիրն է լինելու արժանի դրսևորել իրենց:

Սեմինարը կվարի չեխ մանագետը

Հինգշաբթի, 13 Մայիս 2010 10:59

Մայիսի 14-16 Երևանում կանցկացվի հանդբոլի մարզիչների սեմինար, որը կվարի չեխ մասնագետ Մարտին Տուման: Ինչպես հայտնի է, Հայաստանում իրականացվում է հանդբոլի զարգացման «Սմարթ» ծրագիրը, և վեց մարզիչներ այդ մարզաձևի գաղտնիքներում հմտացնում են պատանիների և աղջիկների դպրոցական երկուական խմբերի:Ընդհանուր հաշվով պարապում է 12 խումբ: Եվ ահա, այդ ծրագրի շրջանակում Եվրոպայի հանդբոլի ֆեդերացիան Հայաստան է գործուղել  Տումային, ով տեսական և գործնական պարապմունքներ կանցկացնի հանդբոլի երիտասարդ մարզիչների հետ: Մայիսի 14-ին ժամը 11-ին մայրաքաղաքի Հյուսիսային համալսարանի դահլիճում կկազմակերպվի տեսական պարապմունք: Ապա մասնակիցները Երևանի Ջոն Կիրակոսյանի անվան դպրոցի մարզասրահում գործնական պարապմունքներ կանցկացնեն: Եվ այդպես կշարունակվի ևս երկու օր: Հրավիրվել են Հայաստանի բոլոր մարզերից: Նախատեսվում է, որ սեմինարին կմասնակցեն երեք տասնյակից ավելի մարզիչներ: Վերջում` նրանք  հավաստագրեր կստանան: Ի դեպ, մեր երկրի ազգային օլիմպիական կոմիտեն նախատեսում է հուլիսին Հայաստանում հանդբոլի մարզիչների համար կազմակերպել 10-օրյա սեմինար: Արդեն հայտնի է, որ դասընթացը վարելու համար մասնագետ է գալու Սիրիայից: Միջոցառմանը կայանալու է Վանաձորում: Սեմինարի ավարտից հետո Հայաստանի մասնագետները քննություն կհանձնեն և մարզչական կարգ կստանան:

Շենգավիթցիներն առաջ են անցնում

Չորեքշաբթի, 28 Ապրիլ 2010 18:53

Վանաձորում ավարտվեց Հայաստանի հանդբոլի աղջիկների առաջնության առաջին շրջանի մրցաշարը: Վերջին հինգ հանդիպումներում հետևյալ արդյունքներն արձանագրվեցին.

Ընթերցել...