Նորություններ

ՀԱՅՏԱՐԱՐՈՒԹՅՈՒՆ

Չորեքշաբթի, 28 Օգոստոս 2019 12:08

Ս/թ օգոստոսի 25-ից սեպտեմբերի 25-ը Հայաստանի ֆիզիկական կուլտուրայի և սպորտի պետական ինստիտուտում կատարվում է հեռակա ֆակուլտետի ուսանողների գործերի ընդունում:

ՀՀ հանդբոլի ֆեդերացիան հրավիրում է բոլոր ցանկացողներին մասնակցելու ընդունելության քննություններին:

Ձեզ հետաքրքրող հարցերի համար կարող եք զանգահարել 094111324 հեռախոսահամարով և ստանալ մանրամասն տեղեկություններ:

ՀՀ հանդբոլի ֆեդերացիա

Շնորհակալություն մրցավարներին

ՈՒրբաթ, 16 Օգոստոս 2019 23:07

Ավարտվեց 7-րդ համահայկական խաղերի ծրագրով հանդբոլի մրցաշարը, որը մեծ հետաքրքրություն էր առաջացրել Հայաստանի հանդբոլի սիրահարների մոտ, քանի որ մրցաշարին մասնակցում էին Հայաստանի և Արցախի 6 տղամարդկանց թիմեր։ Մրցումների մասնակիցների քանակը ամենևին չէր ցածրացրել մասնակից թիմերի մոտ հաղթանակին հասնելու ձգտումը, որի վկայությունն էր մրցումների յուրաքանչյուր օրվա խաղերի մրցակցությունը, որը վառ արտահայտվեց մրցաշարի վերջին օրվա եզրափակիչ` Երևան -Վանաձոր հանդիպման ժամանակ, որի արդյունքը մինչև խաղի վերջին րոպեն պարզ չէր որևիցե երկրպագուի համար։

Ինչևէ խաղը ավարտվեց 1 գնդակի տարբերությամբ, և խաղերի չեմպիոն հռչակվեց Վանաձորի հավաքական թիմը(մարզիչ` Ա. Բարսեղյան): 

Մրցումների ավարտից հետո տեղերը բախվեցին հետևյալ հերթականությամբ`

1. ք. Վանաձոր 1-ին տեղ

2. ք.  Երևան 2-րդ տեղ

3. ք. Ալավերդի 3-րդ տեղ

4. ք. Գավառ 4-րդ տեղ

5. ք. Ստեփանակերտ 5-րդ տեղ

6. ք. Հրազդան 6-րդ տեղ

Հայաստանի հանդբոլի ֆեդերացիան իր երախտագիտությունն է հայտնում հատկապես մրցումները սպասարկող մրցավարական կազմին(գլխ. մրցավար Ա. Մխիթարյան,  մրցավարական հանձնաժողովի նախագահ Ա. Արևշատյանին) առաջին հայացքից պարզ երևացող, սակայն առավել բարդ մրցավարության համար, և հույս հայտնում, որ այսուհետ նույն եռանդով կանցկացնեն նաև առաջիկա մրցաշարերը։

Արդյունավետ հանդիպում

ՈՒրբաթ, 26 Հուլիս 2019 21:54

Հուլիսի 25-ին Գյումրիի քաղաքապետարանում տեղի ունեցավ Գյումրու քաղաքապետ Սամվել Բալասանյանի և ՀՀ հանդբոլի ֆեդերացիայի նախագահ Հարություն Մելքոնյանի հանդիպումը։ Հանդիպմանը ներկա էին հանդբոլի ֆեդերացիայի նախագահության անդամ Աշոտ Ղազարյանը և Գյումրու մարզադպրոցի տնօրեն Սաշա Կիրակոսյանը։ Հանդիպման նպատակը մեկն էր, գտնել հնարավոր համագործակցության ծրագրերը, հանրապետության 2-րդ քաղաքում վերականգնել վաղեմի ավանդույթները` կապված հանդբոլ մարզաձևի հետ։

Գյումրու քաղաքապետը քաջատեղյակ լինելով հանդբոլի վաղեմի հաջողություններին, ինքն էլ ժամանակին` ուսանողական տարիներին բազմիցս մասնակցել է ուսանողական առաջնություններին,  սիրով ընդունեց ֆեդերացիայի նախագահի առաջարկությունները` կապված մարզաձևի հետագա վիճակը բարելավելու ուղղությամբ։ Մասնավորապես ֆեդերացիայի նախագահի կողմից առաջարկվեց մարզադպրոցին տրամադրել ևս մեկ հաստիք(ներկայումս մարզադպրոցում աշխատում է մեկ մարզիչ` Ալվարդ Գրիգորյանը)` հետագայում հանրապետական առաջնություններին բոլոր տարիքային խմբերով (պատանիներ և աղջիկներ) մասնակցելու համար։ Հանդիպման ընթացքում եղավ նաև քաղաքապետին առաջարկ, հանդբոլի վետերան, մարզադպրոցի նախկին տնօրեն ՀՀ վաստակավոր մարզիչ  Հենրիկ Նազարյանին ծննդյան 80-ամյակի կապակցությամբ պարգևատրել քաղաքապետարանի ոսկե մեդալով, որն ընդունվեց պարոն Բալասանյանի կողմից։ Եղավ նաև առաջարկ երկու շահագրգիռ կողմերին գտնել հովանավորներ, որոնք իրենց աջակցությունը կունենան Գյումրիում հետագա վիճակը բարելավելու ուղղությամբ։ Առաջարկություն եղավ նաև մեծ ուշադրություն դարձնել հանրակրթական դպրոցներում պետական ծրագրով նախատեսված հանդբոլի դասերը պատշաճ մակարդակով անցկացնելու համար, ինչպես նաև Շիրակի համալսարանում վերականգնել հանդբոլի մարզիչների պատրաստումը և ցանկացողներին գործուղել Երևան` Հայաստանի Ֆիզիկական կուլտուրայի ինստիտուտում ուսումը շարունակել մագիստրատուրայում <<հանդբոլ>> մասնագիտությամբ` հետագայում մարզչական պակասը լրացնելու համար։ Առաջարկություն եղավ նաև ուսուցիչներ գործուղել Երևան`մասնակցելու Եվրոպայի և միջազգային ֆեդերացիայի կողմից անցկացվող  սեմինար-պարապմունքներին, որոնք կստանան համապատասխան հավաստագրեր, հետագայում իրավունք ունենալով որպես հանդբոլի մարզիչներ աշխատելու համար։

Շնորհակալություն հայտնելով քաղաքապետ Սամվել Բալասանյանին ջերմ և արդյունավետ հանդիպման համար, նախագահության անդամները այցելեցին նաև Գյումրու մարզադպրոց, որտեղ ծանոթացան մարզադահլիճի ներկայիս վիճակին և հույս հայտնեցին, որ հաջորդ տարի պարտադիր կանցկացնեն հանրապետության որևիցե մի առաջնություն Գյումրիում։

Ֆեդերացիայի նախագահության անդամները դատարկաձեռն չէին գնացել Գյումրի։ Ինչպես մարզադպրոցին, այնպես էլ մի քանի հանրակրթական դպրոցներին տրամադրվեցին գնդակներ և դարպասի ցանցեր։

 Վերջում ավելացնենք, որ նմանատիպ հանդիպումները շարունակական են լինելու հանրապետության բոլոր մարզերում, ինչը մեծ խթան կհանդիսանա հանդբոլի մասսայականություն ապահովելու գործում։

ԸՆԿԵՐ ՆԱԶԱՐՅԱՆԸ

Երեքշաբթի, 23 Հուլիս 2019 12:52

Հայաստանում կես դարից ավելի պատմություն ունի ժամանակակից հանդբոլ մարզաձևը, որի հիմնադիրներից և երախտավորներից է հանդիսանում Հայաստանի վաստակավոր մարզիչ, Լենինական քաղաքում հանդբոլ մարզաձևի հիմնադիրներից մեկը` Հենրիկ Նազարյանը:

Չնայած պատկառելի տարիքին` վերջերս է լրացել նրա ծննդյան 80-ամյակը, նա մեծ ոգևորությամբ, երիտասարդին  հատուկ  նախաձեռնությամբ, շարունակում է իրեն առաքելությունը հանդբոլի զարգացման գործում: Նա երիտասարդ տարիքում եղել է առաջատար մարզիկ և երկար տարիներ իր թիմակիցների հետ հանրապետական և համամիութենական մրցաշարերում պատվով պաշտպանել է մեր հանրապետության մարզական դրոշի պատիվը:

Հենրիկ Նազարյանը մի ամբողջ կյանք անմնացորդ նվիրվել է մատաղ սերնդի կրթության և դաստիարակության գործին: Մանկավարժական և մարդկային բարձր որակների, վաստակած փորձի ու հմտության, իր իսկ նկատմամբ խստապահանջության շնորհիվ նա այսօր էլ վայելում է իր նախկին կոլեկտիվի անդամների, բազմաքանակ հանդբոլիստների և նրանց ծնողների սերն ու հարգանքը:

Որպես ղեկավար Հենրիկ Նազարյանը եղել է շրջահայաց, ակտիվ նախաձեռնող ու կազմակերպիչ, որպես մարզիչ` պահանջկոտ, կարգ ու կանոնի մարդ, որպես ծնող և ընկեր` անշահախնդիր, անբասիր:

Հայաստանի հանդբոլի ֆեդերացիան շնորհավորում է Հենրիկ Նազարյանին ծննդյան 80-ամյակի կապակցությամբ և ակնկալում սերտ համագործակցություն, ինչու չէ նաև մեթոդական օգնություն, ինչպես Գյումրու, այնպես էլ ՀՀ հավաքական թիմերին, ունեցած գիտելիքներն ու փորձը ի օգուտ հանդբոլի զարգացման ներդնելու համար:

Եվ որպես վերջաբան, բոլոր հանդբոլիստների մեծագույն ցանկությունն է, որ լինես առողջ ու միշտ շրջապատված լինես քո սաներով, թոռնիկներով և ընկերներով:

Մրցավարական սեմինար

Երկուշաբթի, 22 Հուլիս 2019 15:48

Համահայկական 7-րդ խաղերին ընդառաջ հանդբոլի ֆեդերացիան նախաձեռնել է մրցավարական սեմինարների շարք այն մրցավարների և կոմիսարների մասնակցությամբ, որոնք պետք է սպասարկեն խաղերը։ Սեմինարներն անց են կացնում միջազգային կարգի կոմիսար Աննա Մելքոնյանը և միջազգային կարգի մրցավար Ալեքսան Արևշատյանը։ 

Մասնակիցները ծանոթանում են կանոնների վերջին փոփոխություններին, քննարկում են խաղի ընթացքում վիճելի դրվագները և տեղի է ունենում մտքերի փոխանակում։ Նմանատիպ միջոցառումները կրելու են պարբերական բնույթ։